ਨਵੀਂ ਦਿੱਲੀ, 13 ਮਈ (ਹਿੰ.ਸ.)। ਇਟਲੀ ਦੇ ਦਿੱਗਜ਼ ਫੁੱਟਬਾਲ ਮੈਨੇਜਰ ਕਾਰਲੋ ਐਂਸੇਲੋਟੀ ਹੁਣ ਬ੍ਰਾਜ਼ੀਲ ਦੀ ਪੁਰਸ਼ ਰਾਸ਼ਟਰੀ ਫੁੱਟਬਾਲ ਟੀਮ ਦੀ ਕਮਾਨ ਸੰਭਾਲਣਗੇ। ਬ੍ਰਾਜ਼ੀਲੀਅਨ ਫੁੱਟਬਾਲ ਸੰਘ (ਸੀਬੀਐਫ) ਨੇ ਸੋਮਵਾਰ ਨੂੰ ਇਹ ਐਲਾਨ ਕੀਤਾ। ਐਂਸੇਲੋਟੀ ਇਸ ਸੀਜ਼ਨ ਦੇ ਅੰਤ ਵਿੱਚ ਰੀਅਲ ਮੈਡ੍ਰਿਡ ਛੱਡ ਦੇਣਗੇ ਅਤੇ ਜੂਨ ਤੋਂ ਬ੍ਰਾਜ਼ੀਲ ਦੇ ਕੋਚ ਵਜੋਂ ਅਹੁਦਾ ਸੰਭਾਲਣਗੇ।

ਬ੍ਰਾਜ਼ੀਲੀਅਨ ਫੁੱਟਬਾਲ ਸੰਘ ਨੇ ਪੁਸ਼ਟੀ ਕੀਤੀ :

ਸੀਬੀਐਫ ਦੇ ਪ੍ਰਧਾਨ ਐਡਨਾਲਡੋ ਰੌਡਰਿਗਜ਼ ਨੇ ਇੱਕ ਬਿਆਨ ਵਿੱਚ ਕਿਹਾ, ਕਾਰਲੋ ਐਂਸੇਲੋਟੀ ਨੂੰ ਬ੍ਰਾਜ਼ੀਲ ਲਿਆਉਣਾ ਸਿਰਫ਼ ਇੱਕ ਰਣਨੀਤਕ ਕਦਮ ਨਹੀਂ ਹੈ, ਇਹ ਦੁਨੀਆ ਨੂੰ ਇਹ ਐਲਾਨ ਹੈ ਕਿ ਅਸੀਂ ਸਿਖਰ 'ਤੇ ਵਾਪਸ ਜਾਣ ਲਈ ਵਚਨਬੱਧ ਹਾਂ। ਉਨ੍ਹਾਂ ਕਿਹਾ,‘‘ਉਹ ਇਤਿਹਾਸ ਦੇ ਸਭ ਤੋਂ ਮਹਾਨ ਕੋਚ ਹਨ ਅਤੇ ਹੁਣ ਉਹ ਦੁਨੀਆ ਦੀ ਸਭ ਤੋਂ ਮਹਾਨ ਰਾਸ਼ਟਰੀ ਟੀਮ ਦੀ ਅਗਵਾਈ ਕਰਨਗੇ। ਇਕੱਠੇ ਮਿਲ ਕੇ ਅਸੀਂ ਬ੍ਰਾਜ਼ੀਲੀਅਨ ਫੁੱਟਬਾਲ ਵਿੱਚ ਇੱਕ ਹੋਰ ਸੁਨਹਿਰੀ ਅਧਿਆਇ ਲਿਖਾਂਗੇ।

ਰੀਅਲ ਮੈਡ੍ਰਿਡ ’ਚ ਸ਼ਾਨਦਾਰ ਪਰ ਟ੍ਰਾਫੀ ਰਹਿਤ ਆਖਰੀ ਸੀਜ਼ਨ :

ਐਂਸੇਲੋਟੀ ਰੀਅਲ ਮੈਡ੍ਰਿਡ ਦੇ ਸਭ ਤੋਂ ਸਫਲ ਮੈਨੇਜਰ ਰਹੇ ਹਨ। ਕਲੱਬ ਨੇ ਹੁਣ ਤੱਕ ਉਨ੍ਹਾਂ ਦੀ ਅਗਵਾਈ ਵਿੱਚ 15 ਖਿਤਾਬ ਜਿੱਤੇ ਹਨ, ਪਰ ਉਹ 2024-25 ਸੀਜ਼ਨ ਦਾ ਅੰਤ ਬਿਨਾਂ ਕਿਸੇ ਟਰਾਫੀ ਦੇ ਕਰਨਗੇ।

ਬ੍ਰਾਜ਼ੀਲ ਵਿੱਚ ਹੋਵੇਗੀ ਪਹਿਲੀ ਜ਼ਿੰਮੇਵਾਰੀ ਵਿਸ਼ਵ ਕੱਪ ਕੁਆਲੀਫਾਇਰ :

ਐਂਸੇਲੋਟੀ ਬ੍ਰਾਜ਼ੀਲ ਦੇ ਪਹਿਲੇ ਵਿਦੇਸ਼ੀ ਕੋਚ ਬਣਨਗੇ। ਉਹ ਡੋਰੀਵਲ ਜੂਨੀਅਰ ਦੀ ਥਾਂ ਲੈਣਗੇ, ਜਿਨ੍ਹਾਂ ਨੂੰ ਮਾਰਚ ਵਿੱਚ ਅਰਜਨਟੀਨਾ ਤੋਂ 4-1 ਦੀ ਹਾਰ ਤੋਂ ਬਾਅਦ ਬਰਖਾਸਤ ਕਰ ਦਿੱਤਾ ਗਿਆ ਸੀ। ਐਂਸੇਲੋਟੀ ਦੀ ਪਹਿਲੀ ਚੁਣੌਤੀ ਅਗਲੇ ਮਹੀਨੇ ਇਕਵਾਡੋਰ ਅਤੇ ਪੈਰਾਗੁਏ ਵਿਰੁੱਧ ਵਿਸ਼ਵ ਕੱਪ ਕੁਆਲੀਫਾਇਰ ਮੁਕਾਬਲੇ ਹੋਣਗੇ।

ਬ੍ਰਾਜ਼ੀਲ ਮੁਸ਼ਕਲ ਵਿੱਚ, ਨੇਮਾਰ ਦੀ ਫਾਰਮ ਚਿੰਤਾ ਦਾ ਵਿਸ਼ਾ :

ਬ੍ਰਾਜ਼ੀਲ ਇਸ ਸਮੇਂ ਵਿਸ਼ਵ ਕੱਪ ਕੁਆਲੀਫਾਈਂਗ ਵਿੱਚ 14 ਮੈਚਾਂ ਤੋਂ ਬਾਅਦ ਚੌਥੇ ਸਥਾਨ 'ਤੇ ਹੈ। ਟੀਮ ਦੇ ਸਟਾਰ ਖਿਡਾਰੀ ਨੇਮਾਰ 2023 ਵਿੱਚ ਏਸੀਐਲ ਦੀ ਸੱਟ ਤੋਂ ਬਾਅਦ ਅਜੇ ਤੱਕ ਫਾਰਮ ਵਿੱਚ ਵਾਪਸ ਨਹੀਂ ਆਏ ਹਨ। ਹਾਲਾਂਕਿ, ਦੱਖਣੀ ਅਮਰੀਕਾ ਦੀਆਂ ਚੋਟੀ ਦੀਆਂ ਛੇ ਟੀਮਾਂ 2026 ਵਿਸ਼ਵ ਕੱਪ ਲਈ ਸਿੱਧੇ ਕੁਆਲੀਫਾਈ ਕਰਨਗੀਆਂ।

ਐਂਸੇਲੋਟੀ ਦੀ ਨਿਯੁਕਤੀ ਨਾਲ ਬ੍ਰਾਜ਼ੀਲ ਨੂੰ ਇੱਕ ਵਾਰ ਫਿਰ ਵਿਸ਼ਵ ਫੁੱਟਬਾਲ ਵਿੱਚ ਆਪਣਾ ਦਬਦਬਾ ਸਥਾਪਤ ਕਰਨ ਵਿੱਚ ਮਦਦ ਮਿਲਣ ਦੀ ਉਮੀਦ ਹੈ।

ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ