ਨਵੀਂ ਦਿੱਲੀ, 13 ਮਈ (ਹਿੰ.ਸ.)। ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (ਬੀਸੀਸੀਆਈ) ਨੇ ਸੋਮਵਾਰ ਦੇਰ ਰਾਤ ਇੰਡੀਅਨ ਪ੍ਰੀਮੀਅਰ ਲੀਗ (ਆਈਪੀਐਲ) 2025 ਦਾ ਸੋਧਿਆ ਹੋਇਆ ਸ਼ਡਿਊਲ ਜਾਰੀ ਕੀਤਾ। ਇਹ ਟੂਰਨਾਮੈਂਟ ਹੁਣ 17 ਮਈ ਤੋਂ ਮੁੜ ਸ਼ੁਰੂ ਹੋਵੇਗਾ ਅਤੇ ਫਾਈਨਲ ਮੈਚ 3 ਜੂਨ ਨੂੰ ਖੇਡਿਆ ਜਾਵੇਗਾ। ਭਾਰਤ ਅਤੇ ਪਾਕਿਸਤਾਨ ਵਿਚਕਾਰ ਵਧੇ ਸਰਹੱਦੀ ਤਣਾਅ ਕਾਰਨ 9 ਮਈ ਨੂੰ ਆਈਪੀਐਲ ਨੂੰ ਇੱਕ ਹਫ਼ਤੇ ਲਈ ਮੁਲਤਵੀ ਕਰ ਦਿੱਤਾ ਗਿਆ ਸੀ। ਹੁਣ ਬਾਕੀ 17 ਮੈਚ ਬੰਗਲੁਰੂ, ਜੈਪੁਰ, ਦਿੱਲੀ, ਲਖਨਊ, ਮੁੰਬਈ ਅਤੇ ਅਹਿਮਦਾਬਾਦ ਵਿੱਚ ਖੇਡੇ ਜਾਣਗੇ। ਪਲੇਆਫ ਸਥਾਨਾਂ ਦਾ ਐਲਾਨ ਬਾਅਦ ਵਿੱਚ ਕੀਤਾ ਜਾਵੇਗਾ।

ਇਹਨਾਂ ਤਾਰੀਖਾਂ ਨੂੰ ਹੋਣਗੇ ਪਲੇਆਫ ਮੈਚਚਾਰ ਪਲੇਆਫ ਮੈਚਾਂ ਦੀਆਂ ਤਰੀਕਾਂ ਨੂੰ ਅੰਤਿਮ ਰੂਪ ਦੇ ਦਿੱਤਾ ਗਿਆ ਹੈ :ਕੁਆਲੀਫਾਇਰ 1: 29 ਮਈ

ਐਲੀਮੀਨੇਟਰ: 30 ਮਈ

ਕੁਆਲੀਫਾਇਰ 2: 1 ਜੂਨ

ਫਾਈਨਲ: 3 ਜੂਨ

ਟੂਰਨਾਮੈਂਟ ਮੁੜ ਸ਼ੁਰੂ ਹੋਣ ਤੋਂ ਬਾਅਦ ਕੁੱਲ 17 ਮੈਚ ਖੇਡੇ ਜਾਣਗੇ, ਜਿਨ੍ਹਾਂ ਵਿੱਚ ਦੋ ਡਬਲਹੈਡਰ (ਐਤਵਾਰ ਨੂੰ) ਹੋਣਗੇ। ਕੁੱਲ 13 ਲੀਗ ਮੈਚ ਅਤੇ 4 ਪਲੇਆਫ ਮੈਚ ਬਾਕੀ ਹਨ।

ਆਰਸੀਬੀ ਅਤੇ ਕੇਕੇਆਰ ਵਿਚਾਲੇ 17 ਮਈ ਨੂੰ ਹੋਵੇਗਾ ਪਹਿਲਾ ਮੈਚ :

ਆਈਪੀਐਲ ਦੀ ਮੁੜ ਸ਼ੁਰੂਆਤ ਦੇ ਨਾਲ, ਪਹਿਲਾ ਮੈਚ ਰਾਇਲ ਚੈਲੇਂਜਰਜ਼ ਬੰਗਲੌਰ (ਆਰਸੀਬੀ) ਅਤੇ ਕੋਲਕਾਤਾ ਨਾਈਟ ਰਾਈਡਰਜ਼ (ਕੇਕੇਆਰ) ਵਿਚਕਾਰ 17 ਮਈ ਨੂੰ ਬੈਂਗਲੁਰੂ ਵਿੱਚ ਖੇਡਿਆ ਜਾਵੇਗਾ। ਉੱਥੇ ਹੀ ਪੰਜਾਬ ਕਿੰਗਜ਼ (ਪੀਬੀਕੇਐਸ) ਅਤੇ ਦਿੱਲੀ ਕੈਪੀਟਲਜ਼ (ਡੀਸੀ) ਵਿਚਕਾਰ ਮੈਚ, ਜੋ ਕਿ 8 ਮਈ ਨੂੰ ਧਰਮਸ਼ਾਲਾ ਵਿੱਚ ਅਧੂਰਾ ਰਹਿ ਗਿਆ ਸੀ, ਹੁਣ 24 ਮਈ ਨੂੰ ਜੈਪੁਰ ਵਿੱਚ ਹੋਵੇਗਾ, ਜੋ ਕਿ ਪੰਜਾਬ ਦਾ ਅਸਥਾਈ ਘਰੇਲੂ ਮੈਦਾਨ ਹੋਵੇਗਾ। ਪੰਜਾਬ ਨੂੰ 26 ਮਈ ਨੂੰ ਜੈਪੁਰ ਵਿੱਚ ਮੁੰਬਈ ਇੰਡੀਅਨਜ਼ ਵਿਰੁੱਧ ਵੀ ਖੇਡਣਾ ਪਵੇਗਾ। ਪਹਿਲਾਂ ਇਹ ਮੈਚ ਧਰਮਸ਼ਾਲਾ ਵਿੱਚ ਹੋਣਾ ਸੀ।

ਐਤਵਾਰ ਨੂੰ ਡਬਲ ਹੈਡਰ ’ਚ ਹੋਣਗੇ ਇਹ ਮੈਚ :

18 ਮਈ (ਐਤਵਾਰ):

3:30 ਵਜੇ: ਰਾਜਸਥਾਨ ਰਾਇਲਜ਼ ਬਨਾਮ ਪੰਜਾਬ ਕਿੰਗਜ਼

ਸ਼ਾਮ 7:30 ਵਜੇ: ਦਿੱਲੀ ਕੈਪੀਟਲਜ਼ ਬਨਾਮ ਗੁਜਰਾਤ ਟਾਈਟਨਜ਼

25 ਮਈ (ਐਤਵਾਰ):

3:30 ਵਜੇ: ਗੁਜਰਾਤ ਟਾਈਟਨਸ ਬਨਾਮ ਚੇਨਈ ਸੁਪਰ ਕਿੰਗਜ਼

ਸ਼ਾਮ 7:30 ਵਜੇ: ਸਨਰਾਈਜ਼ਰਜ਼ ਹੈਦਰਾਬਾਦ ਬਨਾਮ ਕੋਲਕਾਤਾ ਨਾਈਟ ਰਾਈਡਰਜ਼

ਲੀਗ ਪੜਾਅ ਦਾ ਆਖਰੀ ਮੈਚ 27 ਮਈ ਨੂੰ ਲਖਨਊ ਵਿੱਚ ਲਖਨਊ ਸੁਪਰ ਜਾਇੰਟਸ ਅਤੇ ਆਰਸੀਬੀ ਵਿਚਕਾਰ ਖੇਡਿਆ ਜਾਵੇਗਾ।

ਇਹ ਟੀਮਾਂ ਘਰੇਲੂ ਮੈਦਾਨ ਤੋਂ ਵਾਂਝੀਆਂ ਰਹਿਣਗੀਆਂ :ਸ਼ਡਿਊਲ ਵਿੱਚ ਬਦਲਾਅ ਦੇ ਕਾਰਨ, ਤਿੰਨ ਟੀਮਾਂ - ਪੰਜਾਬ, ਚੇਨਈ ਅਤੇ ਹੈਦਰਾਬਾਦ - ਹੁਣ ਆਪਣੇ ਘਰੇਲੂ ਮੈਦਾਨਾਂ 'ਤੇ ਕੋਈ ਮੈਚ ਨਹੀਂ ਖੇਡ ਸਕਣਗੀਆਂ। ਭਾਵੇਂ ਚੇਨਈ ਅਤੇ ਹੈਦਰਾਬਾਦ ਪਹਿਲਾਂ ਹੀ ਪਲੇਆਫ ਦੀ ਦੌੜ ਤੋਂ ਬਾਹਰ ਹੋ ਚੁੱਕੇ ਹਨ, ਪਰ ਇਹ ਪੰਜਾਬ ਲਈ ਇੱਕ ਵੱਡਾ ਝਟਕਾ ਮੰਨਿਆ ਜਾ ਰਿਹਾ ਹੈ ਕਿਉਂਕਿ ਉਹ 11 ਮੈਚਾਂ ਵਿੱਚ 15 ਅੰਕਾਂ ਨਾਲ ਤੀਜੇ ਸਥਾਨ 'ਤੇ ਸਨ।

ਵਿਦੇਸ਼ੀ ਖਿਡਾਰੀਆਂ ਦੀ ਉਪਲਬਧਤਾ ਬਣੀ ਚੁਣੌਤੀ :

ਆਈਪੀਐਲ ਦਾ ਫਾਈਨਲ ਹੁਣ 3 ਜੂਨ ਨੂੰ ਖੇਡਿਆ ਜਾਵੇਗਾ, ਜਿਸਦਾ ਟਕਰਾਅ 29 ਮਈ ਤੋਂ ਇੰਗਲੈਂਡ ਅਤੇ ਵੈਸਟਇੰਡੀਜ਼ ਵਿਚਕਾਰ ਸ਼ੁਰੂ ਹੋਣ ਵਾਲੀ ਇੱਕ ਰੋਜ਼ਾ ਲੜੀ ਨਾਲ ਹੋਵੇਗਾ। ਇਸ ਨਾਲ ਵੈਸਟਇੰਡੀਜ਼ ਦੇ ਖਿਡਾਰੀ ਰੋਮਾਰੀਓ ਸ਼ੈਫਰਡ (ਆਰਸੀਬੀ), ਸ਼ਾਮਾਰ ਜੋਸਫ਼ (ਐਲਐਸਜੀ) ਅਤੇ ਸ਼ੇਰਫੇਨ ਰਦਰਫੋਰਡ (ਗੁਜਰਾਤ) ਆਈਪੀਐਲ ਪਲੇਆਫ ਤੋਂ ਬਾਹਰ ਹੋ ਸਕਦੇ ਹਨ। ਇੰਗਲੈਂਡ ਨੇ ਅਜੇ ਆਪਣੀ ਟੀਮ ਦਾ ਐਲਾਨ ਨਹੀਂ ਕੀਤਾ ਹੈ ਪਰ ਜੋਸ ਬਟਲਰ, ਫਿਲ ਸਾਲਟ, ਲੀਅਮ ਲਿਵਿੰਗਸਟੋਨ, ​​ਵਿਲ ਜੈਕਸ ਅਤੇ ਰੀਸ ਟੌਪਲੇ ਵਰਗੇ ਖਿਡਾਰੀ ਵੀ ਪ੍ਰਭਾਵਿਤ ਹੋ ਸਕਦੇ ਹਨ।

ਡਬਲਯੂਟੀਸੀ ਫਾਈਨਲ ਅਤੇ ਇੰਡੀਆ ਏ ਟੂਰ ਵੀ ਪ੍ਰਭਾਵਿਤ : ਆਈਪੀਐਲ ਫਾਈਨਲ ਤੋਂ ਸਿਰਫ਼ ਸੱਤ ਦਿਨ ਬਾਅਦ, ਵਿਸ਼ਵ ਟੈਸਟ ਚੈਂਪੀਅਨਸ਼ਿਪ ਦਾ ਫਾਈਨਲ 11 ਜੂਨ ਤੋਂ ਇੰਗਲੈਂਡ ਦੇ ਲਾਰਡਸ ਵਿਖੇ ਖੇਡਿਆ ਜਾਵੇਗਾ, ਜਿਸ ਵਿੱਚ ਆਸਟ੍ਰੇਲੀਆ ਅਤੇ ਦੱਖਣੀ ਅਫਰੀਕਾ ਇੱਕ ਦੂਜੇ ਦਾ ਸਾਹਮਣਾ ਕਰਨਗੇ। ਇਸ ਨਾਲ ਆਈਪੀਐਲ ਵਿੱਚ ਖੇਡਣ ਵਾਲੇ ਕਈ ਆਸਟ੍ਰੇਲੀਆਈ ਅਤੇ ਦੱਖਣੀ ਅਫਰੀਕਾ ਦੇ ਖਿਡਾਰੀਆਂ 'ਤੇ ਅਸਰ ਪੈ ਸਕਦਾ ਹੈ। ਇਸ ਦੇ ਨਾਲ ਹੀ, 30 ਮਈ ਤੋਂ ਸ਼ੁਰੂ ਹੋਣ ਵਾਲੇ ਭਾਰਤ ਏ ਦੇ ਇੰਗਲੈਂਡ ਦੌਰੇ ਲਈ ਸੰਭਾਵੀ ਖਿਡਾਰੀਆਂ ਦੀ ਉਪਲਬਧਤਾ ਵੀ ਹੁਣ ਸ਼ੱਕ ਦੇ ਘੇਰੇ ਵਿੱਚ ਹੈ।

ਟੀਮਾਂ ਨੂੰ ਦੁਬਾਰਾ ਜੋੜਨ ਦੀ ਚੁਣੌਤੀ :

ਬੀਸੀਸੀਆਈ ਦੇ ਅਨੁਸਾਰ, ਆਈਪੀਐਲ ਦੁਬਾਰਾ ਸ਼ੁਰੂ ਕਰਨ ਤੋਂ ਪਹਿਲਾਂ ਸਰਕਾਰ ਅਤੇ ਸੁਰੱਖਿਆ ਏਜੰਸੀਆਂ ਨਾਲ ਵਿਆਪਕ ਸਲਾਹ-ਮਸ਼ਵਰਾ ਕੀਤਾ ਗਿਆ। ਹੁਣ ਫ੍ਰੈਂਚਾਇਜ਼ੀਆਂ ਲਈ ਸਭ ਤੋਂ ਵੱਡੀ ਚੁਣੌਤੀ ਖਿਡਾਰੀਆਂ ਅਤੇ ਸਪੋਰਟ ਸਟਾਫ ਨੂੰ ਭਾਰਤ ਵਾਪਸ ਬੁਲਾਉਣਾ ਹੋਵੇਗਾ। ਗੁਜਰਾਤ ਟਾਈਟਨਸ ਸਭ ਤੋਂ ਘੱਟ ਪ੍ਰਭਾਵਿਤ ਹੋਇਆ ਹੈ ਕਿਉਂਕਿ ਉਨ੍ਹਾਂ ਦੇ ਸਿਰਫ਼ ਦੋ ਵਿਦੇਸ਼ੀ ਖਿਡਾਰੀ (ਬਟਲਰ ਅਤੇ ਕੋਏਟਜ਼ੀ) ਬਾਹਰ ਗਏ ਹਨ ਅਤੇ ਬਾਕੀ ਟੀਮ ਅਹਿਮਦਾਬਾਦ ਵਿੱਚ ਅਭਿਆਸ ਕਰ ਰਹੀ ਸੀ।

ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ