ਢਾਕਾ (ਬੰਗਲਾਦੇਸ਼), 16 ਸਤੰਬਰ (ਹਿੰ.ਸ.)। ਬੰਗਲਾਦੇਸ਼ ਵਿੱਚ ਨਵਰਾਤਰੀ ਅਤੇ ਦੁਰਗਾ ਪੂਜਾ ਤੋਂ ਪਹਿਲਾਂ ਹਿੰਦੂ ਮੰਦਰ ਵਿੱਚ ਹੋਈ ਭੰਨਤੋੜ ਤੋਂ ਘੱਟ ਗਿਣਤੀ ਭਾਈਚਾਰਾ ਡਰਿਆ ਹੋਇਆ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਐਤਵਾਰ ਰਾਤ ਨੂੰ ਕੁਸ਼ਤੀਆ ਦੇ ਮੀਰਪੁਰ ਉਪ-ਜ਼ਿਲ੍ਹੇ ਵਿੱਚ ਸਥਿਤ ਸਵਰੂਪਦਾਹ ਪਾਲਪਾਰਾ ਸ਼੍ਰੀ ਸ਼੍ਰੀ ਰੱਖਾ ਕਾਲੀ ਮੰਦਰ ਵਿੱਚ ਸ਼ਰਾਰਤੀ ਅਨਸਰਾਂ ਨੇ ਦੋ ਮੂਰਤੀਆਂ ਦੀ ਭੰਨਤੋੜ ਕੀਤੀ। ਭੰਨਤੋੜ ਕਰਨ ਤੋਂ ਬਾਅਦ, ਸ਼ਰਾਰਤੀ ਅਨਸਰ ਆਪਣੇ ਨਾਲ ਇੱਕ ਸੀਸੀਟੀਵੀ ਅਤੇ ਇੱਕ ਮੈਮਰੀ ਕਾਰਡ ਲੈ ਗਏ।

ਦ ਡੇਲੀ ਸਟਾਰ ਅਖਬਾਰ ਦੀ ਰਿਪੋਰਟ ਦੇ ਅਨੁਸਾਰ, ਮੀਰਪੁਰ ਪੁਲਿਸ ਸਟੇਸ਼ਨ ਦੇ ਇੰਚਾਰਜ ਮੋਮੀਨੁਲ ਇਸਲਾਮ ਨੇ ਦੱਸਿਆ ਕਿ ਇਹ ਘਟਨਾ ਐਤਵਾਰ ਰਾਤ 8:00 ਵਜੇ ਤੋਂ 8:30 ਵਜੇ ਦੇ ਵਿਚਕਾਰ ਵਾਪਰੀ ਹੋਵੇਗੀ। ਅਜੇ ਤੱਕ ਕਿਸੇ ਨੂੰ ਗ੍ਰਿਫ਼ਤਾਰ ਨਹੀਂ ਕੀਤਾ ਗਿਆ ਹੈ ਅਤੇ ਨਾ ਹੀ ਕੋਈ ਸ਼ਿਕਾਇਤ ਦਰਜ ਕਰਵਾਈ ਗਈ ਹੈ। ਘਟਨਾ ਦੀ ਜਾਂਚ ਕੀਤੀ ਜਾ ਰਹੀ ਹੈ।

ਮੰਦਰ ਕਮੇਟੀ ਦੇ ਸਾਬਕਾ ਸਕੱਤਰ ਬਾਦਲ ਕੁਮਾਰ ਡੇ ਨੇ ਕਿਹਾ ਕਿ ਅਸੀਂ ਪਿਛਲੇ ਤਿੰਨ ਸਾਲਾਂ ਤੋਂ ਇੱਥੇ ਦੁਰਗਾ ਪੂਜਾ ਦਾ ਆਯੋਜਨ ਕਰ ਰਹੇ ਹਾਂ। ਦੁਰਗਾ ਪੂਜਾ ਤੋਂ ਪਹਿਲਾਂ ਹੋਈ ਇਸ ਘਟਨਾ ਕਾਰਨ ਹਰ ਕੋਈ ਦਹਿਸ਼ਤ ਵਿੱਚ ਹੈ। ਉਨ੍ਹਾਂ ਕਿਹਾ ਕਿ ਬਦਮਾਸ਼ਾਂ ਨੇ ਮੰਦਰ ਦਾ ਸੁਰੱਖਿਆ ਕੈਮਰਾ ਅਤੇ ਇਸਦਾ ਮੈਮਰੀ ਕਾਰਡ ਲੁੱਟ ਲਿਆ ਹੈ। ਕੁਸ਼ਤੀਆ ਦੇ ਡਿਪਟੀ ਕਮਿਸ਼ਨਰ ਅਬੂ ਹਸਨਤ ਮੁਹੰਮਦ ਅਰਾਫਿਨ ਨੇ ਸੋਮਵਾਰ ਨੂੰ ਮੌਕੇ ਦਾ ਦੌਰਾ ਕੀਤਾ ਅਤੇ ਕਿਹਾ ਕਿ ਜਾਂਚ ਤੋਂ ਬਾਅਦ ਢੁਕਵੀਂ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ।

ਜਦੋਂ ਮੰਦਰ ਵਿੱਚ ਮੌਜੂਦਾ ਸੁਰੱਖਿਆ ਉਪਾਵਾਂ ਬਾਰੇ ਪੁੱਛਿਆ ਗਿਆ ਤਾਂ ਅਰਾਫਿਨ ਨੇ ਕਿਹਾ ਕਿ ਨਵੇਂ ਕੈਮਰੇ ਲਗਾਏ ਗਏ ਹਨ। ਇਸ ਤੋਂ ਇਲਾਵਾ, ਅੰਸਾਰ ਦੇ ਮੈਂਬਰ 24 ਘੰਟੇ ਡਿਊਟੀ 'ਤੇ ਹਨ। ਉਨ੍ਹਾਂ ਕਿਹਾ, ਹੁਣ ਸਥਿਤੀ ਆਮ ਹੈ। ਮੰਦਰ ਕਮੇਟੀ ਦੇ ਸਕੱਤਰ ਸ਼੍ਰੀਭਾਸ਼ ਕੁਮਾਰ ਡੇ ਨੇ ਕਿਹਾ ਕਿ ਉਨ੍ਹਾਂ ਨੇ ਇਸ ਘਟਨਾ ਬਾਰੇ ਕੁਸ਼ਤੀਆ ਦੇ ਪੁਲਿਸ ਸੁਪਰਡੈਂਟ ਨਾਲ ਚਰਚਾ ਕੀਤੀ ਹੈ।

ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ