ਚੰਡੀਗੜ੍ਹ, 30 ਮਈ (ਹਿੰ.ਸ.)| ਚੰਡੀਗੜ੍ਹ ਨਗਰ ਨਿਗਮ ਸ਼ਹਿਰ ਦੀ ਪੇਡ ਪਾਰਕਿੰਗ ਪ੍ਰਣਾਲੀ ਵਿੱਚ ਵੱਡੇ ਬਦਲਾਅ ਕਰਨ ਦੀ ਤਿਆਰੀ ਕਰ ਰਿਹਾ ਹੈ। ਨਵੀਂ ਯੋਜਨਾ ਤਹਿਤ ਸ਼ਹਿਰ ਦੀਆਂ ਪਾਰਕਿੰਗ ਸਾਈਟਾਂ ਨੂੰ ਚਾਰ ਆਪਰੇਸ਼ਨਲ ਜ਼ੋਨਾਂ ਵਿੱਚ ਵੰਡਿਆ ਜਾਵੇਗਾ ਅਤੇ ਪ੍ਰਮੁੱਖ ਵਪਾਰਕ ਤੇ ਵੱਧ ਭੀੜ-ਭਾੜ ਵਾਲੇ ਖੇਤਰਾਂ ਵਿੱਚ ਪਾਰਕਿੰਗ ਫੀਸ ਵਧਾਉਣ 'ਤੇ ਵਿਚਾਰ ਕੀਤਾ ਜਾ ਰਿਹਾ ਹੈ। ਨਿਗਮ ਵੱਲੋਂ ਸਮਾਰਟ ਪਾਰਕਿੰਗ ਸਿਸਟਮ ਲਾਗੂ ਕਰਨ ਦੀ ਯੋਜਨਾ ਵੀ ਬਣਾਈ ਜਾ ਰਹੀ ਹੈ। ਇਸ ਸਬੰਧੀ ਅਧਿਕਾਰੀ ਮੌਜੂਦਾ ਪਾਰਕਿੰਗ ਪ੍ਰਣਾਲੀ, ਸਮਾਰਟ ਪਾਰਕਿੰਗ ਮਾਡਲ ਅਤੇ ਨਵੇਂ ਟੈਂਡਰ ਡਰਾਫਟ ਦੀ ਸਮੀਖਿਆ ਕਰ ਰਹੇ ਹਨ।

ਨਿਗਮ ਦੇ ਜੁਆਇੰਟ ਕਮਿਸ਼ਨਰ ਡਾ. ਇੰਦਰਜੀਤ ਨੇ ਦੱਸਿਆ ਕਿ ਨਵੀਂ ਪਾਰਕਿੰਗ ਨੀਤੀ ਦਾ ਡਰਾਫਟ ਤਿਆਰ ਕਰ ਲਿਆ ਗਿਆ ਹੈ। ਮੌਜੂਦਾ ਸਮੇਂ ਵਿੱਚ ਚੰਡੀਗੜ੍ਹ ਵਿੱਚ ਇੱਕ ਘੰਟੇ ਅਤੇ 12 ਘੰਟਿਆਂ ਲਈ ਪਾਰਕਿੰਗ ਦਾ ਲਗਭਗ ਇੱਕੋ ਜਿਹਾ ਰੇਟ ਹੈ। ਇਸ ਕਾਰਨ ਕਈ ਲੋਕ ਸਵੇਰੇ ਵਾਹਨ ਖੜ੍ਹਾ ਕਰਕੇ ਸਾਰਾ ਦਿਨ ਲਈ ਛੱਡ ਜਾਂਦੇ ਹਨ ਅਤੇ ਸ਼ਾਮ ਨੂੰ ਲੈ ਕੇ ਜਾਂਦੇ ਹਨ। ਨਤੀਜੇ ਵਜੋਂ ਪਾਰਕਿੰਗ ਸਥਾਨ ਲੰਬੇ ਸਮੇਂ ਤੱਕ ਭਰੇ ਰਹਿੰਦੇ ਹਨ ਅਤੇ ਨਿਗਮ ਨੂੰ ਆਮਦਨ ਦਾ ਵੀ ਨੁਕਸਾਨ ਝੱਲਣਾ ਪੈਂਦਾ ਹੈ।

ਨਵੀਂ ਯੋਜਨਾ ਅਨੁਸਾਰ ਪਾਰਕਿੰਗ ਫੀਸ ਨੂੰ ਘੰਟਿਆਂ ਦੇ ਆਧਾਰ 'ਤੇ ਵਧਾਇਆ ਜਾ ਸਕਦਾ ਹੈ। ਉਦਾਹਰਨ ਵਜੋਂ, ਜੇ ਪਹਿਲੇ ਘੰਟੇ ਲਈ ਫੀਸ 40 ਰੁਪਏ ਹੋਵੇਗੀ ਤਾਂ ਦੂਜੇ ਘੰਟੇ ਲਈ ਇਹ 60 ਰੁਪਏ ਤੱਕ ਹੋ ਸਕਦੀ ਹੈ। ਇਸੇ ਤਰ੍ਹਾਂ 12 ਘੰਟਿਆਂ ਲਈ ਵਾਹਨ ਖੜ੍ਹਾ ਕਰਨ 'ਤੇ 100 ਤੋਂ 200 ਰੁਪਏ ਤੱਕ ਚਾਰਜ ਲਗਾਉਣ ਦਾ ਪ੍ਰਸਤਾਵ ਹੈ।

ਨਿਗਮ ਅਧਿਕਾਰੀਆਂ ਮੁਤਾਬਕ ਸੈਕਟਰ 17, ਸੈਕਟਰ 35 ਅਤੇ ਸੈਕਟਰ 22 ਮੋਬਾਇਲ ਮਾਰਕੀਟ ਵਰਗੇ ਪ੍ਰਮੁੱਖ ਪਾਰਕਿੰਗ ਸਥਾਨਾਂ ਲਈ ਇਸ ਮਾਡਲ 'ਤੇ ਵਿਚਾਰ ਕੀਤਾ ਜਾ ਰਿਹਾ ਹੈ। ਨਵੀਂ ਨੀਤੀ ਦਾ ਇੱਕ ਮੁੱਖ ਉਦੇਸ਼ ਸੈਕਟਰ 17 ਅੰਡਰਗਰਾਉਂਡ ਮਲਟੀਲੈਵਲ ਪਾਰਕਿੰਗ ਦੀ ਵਧੀਆ ਵਰਤੋਂ ਨੂੰ ਯਕੀਨੀ ਬਣਾਉਣਾ ਹੈ। ਅਧਿਕਾਰੀਆਂ ਦੇ ਅਨੁਸਾਰ ਇਹ ਪਾਰਕਿੰਗ ਸਹੂਲਤ ਅਕਸਰ ਖਾਲੀ ਰਹਿੰਦੀ ਹੈ, ਜਦਕਿ ਆਸ-ਪਾਸ ਦੇ ਖੇਤਰਾਂ ਵਿੱਚ ਪਾਰਕਿੰਗ ਦੀ ਕਮੀ ਬਣੀ ਰਹਿੰਦੀ ਹੈ।

ਨਗਰ ਨਿਗਮ ਦਾ ਮੰਨਣਾ ਹੈ ਕਿ ਨਵੀਂ ਪਾਰਕਿੰਗ ਪ੍ਰਣਾਲੀ ਨਾਲ ਨਾ ਸਿਰਫ਼ ਟ੍ਰੈਫਿਕ ਅਤੇ ਪਾਰਕਿੰਗ ਪ੍ਰਬੰਧਨ ਵਿੱਚ ਸੁਧਾਰ ਆਵੇਗਾ, ਸਗੋਂ ਨਿਗਮ ਦੀ ਆਮਦਨ ਵਿੱਚ ਵੀ ਵਾਧਾ ਹੋਵੇਗਾ।

ਹਿੰਦੂਸਥਾਨ ਸਮਾਚਾਰ / GURSHARAN SINGH