ਮਾਸਕੋ, 17 ਜੂਨ (ਹਿੰ.ਸ.)। ਰੂਸੀ ਰੱਖਿਆ ਮੰਤਰਾਲੇ ਨੇ ਦਾਅਵਾ ਕੀਤਾ ਹੈ ਕਿ ਉਸਦੇ ਜੰਗੀ ਜਹਾਜ਼ ਨੇ ਇੰਗਲਿਸ਼ ਚੈਨਲ ਵਿੱਚ ਇੱਕ ਬ੍ਰਿਟਿਸ਼ ਯਾਟ ਨੂੰ ਰੋਕਣ ਲਈ ਚੇਤਾਵਨੀ ਵਾਲੀਆਂ ਗੋਲੀਆਂ ਚਲਾਈਆਂ, ਜਦੋਂ ਕਿ ਯਾਟ ਨੂੰ ਰਸਤਾ ਬਦਲਣ ਤੋਂ ਰੋਕਣ ਦੀਆਂ ਹੋਰ ਸਾਰੀਆਂ ਕੋਸ਼ਿਸ਼ਾਂ ਅਸਫਲ ਹੋ ਗਈਆਂ।

ਰੂਸ ਦੇ ਸਰਕਾਰੀ ਨਿਊਜ਼ ਟੈਲੀਵਿਜ਼ਨ ਨੈੱਟਵਰਕ ਰਸ਼ੀਆ ਟੂਡੇ ਨੇ ਰੱਖਿਆ ਮੰਤਰਾਲੇ ਦੇ ਹਵਾਲੇ ਨਾਲ ਕਿਹਾ ਕਿ ਮੰਗਲਵਾਰ ਦੁਪਹਿਰ ਨੂੰ, ਜਦੋਂ ਉਨ੍ਹਾਂ ਦਾ ਜੰਗੀ ਜਹਾਜ਼ ਐਡਮਿਰਲ ਗ੍ਰਿਗੋਰੋਵਿਚ ਆਈਲ ਆਫ਼ ਵਾਈਟ ਅਤੇ ਨੌਰਮੈਂਡੀ ਦੇ ਵਿਚਕਾਰ ਅੰਤਰਰਾਸ਼ਟਰੀ ਪਾਣੀਆਂ ਵਿੱਚੋਂ ਲੰਘ ਰਿਹਾ ਸੀ, ਤਾਂ ਜਹਾਜ਼ ਦੇ ਅਮਲੇ ਨੇ ਬ੍ਰਾਈਟ ਫਿਊਚਰ ਨਾਮ ਦੀ ਇੱਕ ਬ੍ਰਿਟਿਸ਼ ਯਾਟ ਦੇਖੀ, ਜੋ ਕਥਿਤ ਤੌਰ 'ਤੇ ਇੱਕ ਅਜਿਹੇ ਰਸਤੇ 'ਤੇ ਚੱਲ ਰਹੀ ਸੀ ਜੋ ਇਸਨੂੰ ਜੰਗੀ ਜਹਾਜ਼ ਦੇ ਬਹੁਤ ਨੇੜੇ ਲਿਆ ਸਕਦਾ ਸੀ।

ਮੰਤਰਾਲੇ ਨੇ ਕਿਹਾ ਕਿ ਰੂਸੀ ਚਾਲਕ ਦਲ ਨੇ ਪਹਿਲਾਂ ਰੇਡੀਓ ਰਾਹੀਂ ਯਾਟ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ, ਪਰ ਕੋਈ ਜਵਾਬ ਨਹੀਂ ਮਿਲਿਆ। ਫਿਰ ਸਿਗਨਲ ਫਲੇਅਰ ਛੱਡੇ ਗਏ ਅਤੇ ਸਾਇਰਨ ਵਜਾਇਆ, ਪਰ ਯਾਟ ਨੇ ਰਸਤਾ ਨਹੀਂ ਬਦਲਿਆ। ਰੂਸੀ ਅਧਿਕਾਰੀਆਂ ਦੇ ਅਨੁਸਾਰ, ਜਦੋਂ ਯਾਟ ਜੰਗੀ ਜਹਾਜ਼ ਤੋਂ ਲਗਭਗ 150 ਮੀਟਰ ਦੂਰੀ ’ਤੇ ਆਗਈ, ਤਾਂ ਕਮਾਂਡਰ ਨੇ ਚੇਤਾਵਨੀ ਵਜੋਂ ਛੋਟੇ ਹਥਿਆਰਾਂ ਨਾਲ ਗੋਲੀਬਾਰੀ ਦਾ ਆਦੇਸ਼ ਦਿੱਤਾ। ਇਸ ਤੋਂ ਬਾਅਦ ਯਾਟ ਨੇ ਤੁਰੰਤ ਰਸਤਾ ਬਦਲਿਆ ਅਤੇ ਜੰਗੀ ਜਹਾਜ਼ ਤੋਂ ਦੂਰ ਚਲੀ ਗਈ।

ਰੂਸ ਨੇ ਦਾਅਵਾ ਕੀਤਾ ਕਿ ਉਸਦੇ ਚਾਲਕ ਦਲ ਨੇ ਅੰਤਰਰਾਸ਼ਟਰੀ ਸਮੁੰਦਰੀ ਨਿਯਮਾਂ ਦੀ ਪੂਰੀ ਤਰ੍ਹਾਂ ਪਾਲਣਾ ਕੀਤੀ ਅਤੇ ਕਿਸੇ ਵੀ ਸੰਭਾਵੀ ਹਾਦਸੇ ਨੂੰ ਰੋਕਣ ਲਈ ਸਾਰੇ ਜ਼ਰੂਰੀ ਕਦਮ ਚੁੱਕੇ। ਰਸ਼ੀਆ ਟੂਡੇ ਦੇ ਅਨੁਸਾਰ, ਇਹ ਘਟਨਾ ਸਭ ਤੋਂ ਪਹਿਲਾਂ ਬ੍ਰਿਟਿਸ਼ ਮੀਡੀਆ ਵਿੱਚ ਰਿਪੋਰਟ ਕੀਤੀ ਗਈ। ਹਾਲਾਂਕਿ, ਬ੍ਰਿਟਿਸ਼ ਰਿਪੋਰਟਾਂ ਵਿੱਚ ਜੰਗੀ ਜਹਾਜ਼ ਦੇ ਨੇੜੇ ਆਉਣ ਦਾ ਜ਼ਿਕਰ ਨਹੀਂ ਕੀਤਾ ਗਿਆ। ਬ੍ਰਿਟਿਸ਼ ਰੱਖਿਆ ਮੰਤਰਾਲੇ ਨੇ ਵਿਸਥਾਰ ਵਿੱਚ ਟਿੱਪਣੀ ਕਰਨ ਤੋਂ ਇਨਕਾਰ ਕਰ ਦਿੱਤਾ, ਸਿਰਫ ਇਹ ਕਿਹਾ ਕਿ ਉਹ ਇੰਗਲਿਸ਼ ਚੈਨਲ ਵਿੱਚ ਘਟਨਾ ਦੀਆਂ ਰਿਪੋਰਟਾਂ ਦੀ ਜਾਂਚ ਕਰ ਰਿਹਾ ਹੈ।

ਇੱਕ ਹੋਰ ਮੀਡੀਆ ਰਿਪੋਰਟ ਦੇ ਅਨੁਸਾਰ, ਕਾਲੀਬਰ ਕਰੂਜ਼ ਮਿਜ਼ਾਈਲਾਂ ਨਾਲ ਲੈਸ 3,600 ਟਨ ਵਾਲੇ ਰੂਸੀ ਜੰਗੀ ਜਹਾਜ਼ ਐਡਮਿਰਲ ਗ੍ਰਿਗੋਰੋਵਿਚ ਦੀ ਘਟਨਾ ਦੇ ਸਮੇਂ ਰਾਇਲ ਨੇਵੀ ਗਸ਼ਤੀ ਜਹਾਜ਼ ਐਚਐਮਐਸ ਮਰਸੀ ਦੁਆਰਾ ਨਿਗਰਾਨੀ ਕੀਤੀ ਜਾ ਰਹੀ ਸੀ। ਹਾਲਾਂਕਿ, ਦੋਵਾਂ ਜਹਾਜ਼ਾਂ ਵਿਚਕਾਰ ਸਹੀ ਦੂਰੀ ਅਸਪਸ਼ਟ ਹੈ।

ਇਹ ਘਟਨਾਕ੍ਰਮ ਬ੍ਰਿਟਿਸ਼ ਕਮਾਂਡੋਜ਼ ਵੱਲੋਂ ਇੰਗਲਿਸ਼ ਚੈਨਲ ਵਿੱਚ ਸਮਾਰਟੋਸ ਨਾਮਕ ਕੈਮਰੂਨ ਦੇ ਝੰਡੇ ਵਾਲੇ ਤੇਲ ਟੈਂਕਰ ਨੂੰ ਜ਼ਬਤ ਕਰਨ ਤੋਂ ਦੋ ਦਿਨ ਬਾਅਦ ਆਇਆ ਹੈ। ਮੰਨਿਆ ਜਾ ਰਿਹਾ ਹੈ ਕਿ ਇਹ ਜਹਾਜ਼ ਰੂਸੀ ਤੇਲ ਦੀ ਤਸਕਰੀ ਕਰ ਰਿਹਾ ਸੀ। ਬ੍ਰਿਟਿਸ਼ ਪ੍ਰਧਾਨ ਮੰਤਰੀ ਕੀਰ ਸਟਾਰਮਰ ਨੇ ਇਸਨੂੰ ਰੂਸ ਦੇ ਅਖੌਤੀ ਸ਼ੈਡੋ ਫਲੀਟ ਦਾ ਹਿੱਸਾ ਦੱਸਿਆ, ਇਹ ਸ਼ਬਦ ਪੱਛਮੀ ਬੀਮਾ ਕਵਰੇਜ ਤੋਂ ਬਿਨਾਂ ਰੂਸੀ ਤੇਲ ਲਿਜਾਣ ਵਾਲੇ ਟੈਂਕਰਾਂ ਲਈ ਵਰਤਿਆ ਜਾਂਦਾ ਹੈ।

ਮਾਹਿਰਾਂ ਦਾ ਮੰਨਣਾ ਹੈ ਕਿ ਹਾਲ ਹੀ ਦੀਆਂ ਘਟਨਾਵਾਂ ਇੰਗਲਿਸ਼ ਚੈਨਲ ਵਿੱਚ ਰੂਸ ਅਤੇ ਬ੍ਰਿਟੇਨ ਵਿਚਕਾਰ ਵਧ ਰਹੇ ਤਣਾਅ ਦਾ ਸੰਕੇਤ ਹੋ ਸਕਦੀਆਂ ਹਨ।

ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ