ਸਿਓਲ, 26 ਜੂਨ (ਹਿੰ.ਸ.)। ਉੱਤਰੀ ਕੋਰੀਆ ਦੇ ਰਾਸ਼ਟਰਪਤੀ ਕਿਮ ਜੋਂਗ-ਉਨ ਦੀ ਨਿਗਰਾਨੀ ਹੇਠ ਦੱਖਣੀ ਕੋਰੀਆ ਨੂੰ ਨਿਸ਼ਾਨਾ ਬਣਾਉਣ ਦੇ ਸਮਰੱਥ ਉੱਨਤ ਹਥਿਆਰਾਂ ਦਾ ਟੈਸਟ ਕੀਤਾ ਗਿਆ। ਸਰਕਾਰੀ ਮੀਡੀਆ ਦੇ ਅਨੁਸਾਰ, ਇਨ੍ਹਾਂ ਪ੍ਰੀਖਣਾਂ ਵਿੱਚ ਨਵੇਂ ਮਲਟੀਪਲ ਰਾਕੇਟ ਲਾਂਚਰ, ਰਣਨੀਤਕ ਬੈਲਿਸਟਿਕ ਮਿਜ਼ਾਈਲਾਂ ਅਤੇ ਲੰਬੀ ਦੂਰੀ ਤੱਕ ਮਾਰ ਕਰਬਨ ਵਾਲੇ ਤੋਪਖਾਨੇ ਦੇ ਗੋਲੇ ਸ਼ਾਮਲ ਸਨ।
ਉੱਤਰੀ ਕੋਰੀਆ ਦੀ ਸਰਕਾਰੀ ਸਮਾਚਾਰ ਏਜੰਸੀ ਯੋਨਹਾਪ ਨੇ ਦੱਖਣੀ ਕੋਰੀਆ ਦੇ ਸਰਕਾਰੀ ਮੀਡੀਆ ਕੇਸੀਐਨਏ ਦੇ ਹਵਾਲੇ ਨਾਲ ਦੱਸਿਆ ਕਿ ਉੱਤਰੀ ਕੋਰੀਆ ਦੇ ਰਾਸ਼ਟਰਪਤੀ ਕਿਮ ਜੋਂਗ-ਉਨ ਨੇ ਦੱਖਣੀ ਕੋਰੀਆ ਨੂੰ ਨਿਸ਼ਾਨਾ ਬਣਾਉਣ ਦੇ ਸਮਰੱਥ ਨਵੇਂ ਅਤੇ ਉੱਨਤ ਹਥਿਆਰਾਂ ਦੇ ਪ੍ਰੀਖਣ ਦੀ ਨਿੱਜੀ ਤੌਰ 'ਤੇ ਨਿਗਰਾਨੀ ਕੀਤੀ। ਇਹ ਪ੍ਰੀਖਣ ਦੇਸ਼ ਦੀ ਪੰਜ ਸਾਲਾ ਰੱਖਿਆ ਵਿਕਾਸ ਯੋਜਨਾ ਦੇ ਤਹਿਤ ਤੋਪਖਾਨੇ ਅਤੇ ਮਿਜ਼ਾਈਲ ਪ੍ਰਣਾਲੀਆਂ ਨੂੰ ਆਧੁਨਿਕ ਬਣਾਉਣ ਦੇ ਉਦੇਸ਼ ਨਾਲ ਕੀਤਾ ਗਿਆ।
ਵੀਰਵਾਰ ਨੂੰ ਕੀਤੇ ਗਏ ਟੈਸਟਾਂ ਵਿੱਚ 240ਐਮਐਮ 24-ਟਿਊਬ ਮਲਟੀਪਲ ਰਾਕੇਟ ਲਾਂਚਰ ਸਿਸਟਮ ਦੇ ਅਪਗ੍ਰੇਡ ਕੀਤੇ ਸੰਸਕਰਣ, ਰਣਨੀਤਕ ਬੈਲਿਸਟਿਕ ਮਿਜ਼ਾਈਲਾਂ ਲਈ ਵਿਸ਼ੇਸ਼ ਮਿਸ਼ਨ ਵਾਰਹੈੱਡ, ਅਤੇ 155ਐਮਐਮ ਸਵੈ-ਚਾਲਿਤ ਹਾਵਿਟਜ਼ਰ ਲਈ ਇੱਕ ਲੰਬੀ ਦੂਰੀ ਦੇ ਪ੍ਰੋਜੈਕਟਾਈਲ ਦੀ ਸਮਰੱਥਾ ਦੀ ਜਾਂਚ ਕੀਤੀ ਗਈ।
ਕੇਸੀਐਨਏ ਦੇ ਅਨੁਸਾਰ, ਨਵੇਂ 24-ਟਿਊਬ ਰਾਕੇਟ ਲਾਂਚਰ ਵਿੱਚ ਆਟੋਨੋਮਸ ਪ੍ਰਿਸਿਜਨ ਗਾਈਡੈਂਯ ਸਿਸਟਮ ਲਗਾਇਆ ਗਿਆ ਹੈ, ਜੋ ਇਸਦੀ ਰੇਂਜ ਨੂੰ 90 ਕਿਲੋਮੀਟਰ ਤੱਕ ਵਧਾ ਦਿੰਦੀ ਹੈ। ਉੱਥੇ ਹੀ 155ਐਮਐਮ ਹਾਵਿਟਜ਼ਰ ਲਈ 65 ਕਿਲੋਮੀਟਰ ਤੱਕ ਦੀ ਰੇਂਜ ਵਾਲੇ ਇੱਕ ਨਵੇਂ ਪ੍ਰੋਜੈਕਟਾਈਲ ਦਾ ਵੀ ਸਫਲਤਾਪੂਰਵਕ ਟੈਸਟ ਕੀਤਾ ਗਿਆ।
ਉੱਤਰੀ ਕੋਰੀਆ ਨੇ ਦਾਅਵਾ ਕੀਤਾ ਕਿ ਰਣਨੀਤਕ ਬੈਲਿਸਟਿਕ ਮਿਜ਼ਾਈਲਾਂ ਦੇ ਵਿਸ਼ੇਸ਼ ਵਾਰਹੈੱਡ ਦੁਸ਼ਮਣ ਦੇ ਹਵਾਈ ਅੱਡਿਆਂ, ਬੰਦਰਗਾਹਾਂ ਅਤੇ ਪਾਵਰ ਪਲਾਂਟਾਂ ਵਰਗੇ ਮਹੱਤਵਪੂਰਨ ਬੁਨਿਆਦੀ ਢਾਂਚੇ ਨੂੰ ਪੂਰੀ ਤਰ੍ਹਾਂ ਤਬਾਹ ਕਰਨ ਲਈ ਤਿਆਰ ਕੀਤੇ ਗਏ ਹਨ।
ਪ੍ਰੀਖਣ ਤੋਂ ਬਾਅਦ, ਕਿਮ ਜੋਂਗ-ਉਨ ਨੇ ਕਿਹਾ ਕਿ ਨਤੀਜੇ ਦੱਖਣੀ ਸਰਹੱਦ 'ਤੇ ਫਾਇਰਪਾਵਰ ਸਥਿਤੀ ਵਿੱਚ ਤਬਦੀਲੀ ਦੇ ਵਿਚਕਾਰ ਦੇਸ਼ ਦੇ ਮੁੱਖ ਹਥਿਆਰਾਂ ਦੀ ਤਕਨੀਕੀ ਤਰੱਕੀ ਨੂੰ ਸਾਬਤ ਕਰਦੇ ਹਨ। ਉਨ੍ਹਾਂ ਕਿਹਾ ਕਿ ਦੁਸ਼ਮਣਾਂ ਨੂੰ ਲਗਾਤਾਰ ਚਿੰਤਾ ਅਤੇ ਡਰ ਦੀ ਸਥਿਤੀ ਵਿੱਚ ਰੱਖਣਾ ਯੁੱਧ ਨੂੰ ਰੋਕਣ ਦੀ ਰਣਨੀਤੀ ਦਾ ਮੁੱਖ ਹਿੱਸਾ ਹੈ ਅਤੇ ਸਾਰੇ ਲੰਬੀ ਦੂਰੀ ਦੇ ਹਥਿਆਰਾਂ ਨੂੰ ਜਲਦੀ ਹੀ ਉੱਨਤ ਸੰਸਕਰਣਾਂ ਨਾਲ ਬਦਲ ਦਿੱਤਾ ਜਾਵੇਗਾ।
ਇਹ ਪ੍ਰੀਖਣ 1950-53 ਦੇ ਕੋਰੀਆਈ ਯੁੱਧ ਦੀ ਸ਼ੁਰੂਆਤ ਦੀ 76ਵੀਂ ਵਰ੍ਹੇਗੰਢ ਦੇ ਮੌਕੇ 'ਤੇ ਕੀਤਾ ਗਿਆ ਹੈ। ਮੰਨਿਆ ਜਾਂਦਾ ਹੈ ਕਿ ਇਸਦਾ ਉਦੇਸ਼ ਦੱਖਣੀ ਕੋਰੀਆ ਵਿੱਚ ਮੁੱਖ ਫੌਜੀ ਅਤੇ ਰਣਨੀਤਕ ਸਥਾਪਨਾਵਾਂ ਨੂੰ ਨਿਸ਼ਾਨਾ ਬਣਾਉਣ ਦੀ ਉੱਤਰੀ ਕੋਰੀਆ ਦੀ ਯੋਗਤਾ ਦਾ ਪ੍ਰਦਰਸ਼ਨ ਕਰਨਾ ਸੀ।
ਉੱਤਰੀ ਕੋਰੀਆ ਨੇ 2023 ਦੇ ਅੰਤ ਤੱਕ ਦੱਖਣੀ ਕੋਰੀਆ ਨੂੰ ਆਪਣਾ ਮੁੱਖ ਦੁਸ਼ਮਣ ਘੋਸ਼ਿਤ ਕੀਤਾ ਸੀ। ਉਦੋਂ ਤੋਂ, ਪਿਓਂਗਯਾਂਗ ਆਪਣੀਆਂ ਰਣਨੀਤਕ ਮਿਜ਼ਾਈਲਾਂ, ਤੋਪਖਾਨਾ ਪ੍ਰਣਾਲੀਆਂ ਅਤੇ ਹੋਰ ਰਵਾਇਤੀ ਹਥਿਆਰਾਂ ਦਾ ਨਿਰੰਤਰ ਆਧੁਨਿਕੀਕਰਨ ਕਰ ਰਿਹਾ ਹੈ ਅਤੇ ਉਨ੍ਹਾਂ ਨੂੰ ਦੱਖਣੀ ਕੋਰੀਆ ਦੀ ਸਰਹੱਦ ਦੇ ਨੇੜੇ ਤਾਇਨਾਤ ਕਰਨ ਦੀ ਨੀਤੀ 'ਤੇ ਚੱਲ ਰਿਹਾ ਹੈ।
ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ
