ਗੁਆਡਾਲਜਾਰਾ, 27 ਜੂਨ (ਹਿੰ.ਸ.)। ਸਪੇਨ ਨੇ ਸ਼ਨੀਵਾਰ ਸਵੇਰੇ ਫੀਫਾ ਵਿਸ਼ਵ ਕੱਪ 2026 ਦੇ ਆਪਣੇ ਆਖਰੀ ਗਰੁੱਪ ਐੱਚ ਮੈਚ ਵਿੱਚ ਉਰੂਗਵੇ ਨੂੰ 1-0 ਨਾਲ ਹਰਾ ਕੇ ਗਰੁੱਪ ਵਿੱਚ ਸਿਖਰ ਸਥਾਨ ਪ੍ਰਾਪਤ ਕਰ ਲਿਆ ਅਤੇ ਨਾਕਆਊਟ ਪੜਾਅ ਵਿੱਚ ਪ੍ਰਵੇਸ਼ ਕੀਤਾ। ਇਸ ਹਾਰ ਦੇ ਨਾਲ, ਮਾਰਸੇਲੋ ਬੀਏਲਸਾ ਦੀ ਉਰੂਗਵੇ ਦੀ ਵਿਸ਼ਵ ਕੱਪ ਮੁਹਿੰਮ ਗਰੁੱਪ ਪੜਾਅ ਵਿੱਚ ਹੀ ਖਤਮ ਹੋ ਗਈ, ਜਦੋਂ ਕਿ ਕੇਪ ਵਰਡੇ ਨੇ ਵੀ ਆਖਰੀ 32 ਵਿੱਚ ਜਗ੍ਹਾ ਬਣਾ ਲਈ।
ਮੈਚ ਦੌਰਾਨ ਪਹਿਲੇ ਹਾਫ ਦੇ 42ਵੇਂ ਮਿੰਟ ਵਿੱਚ ਸਪੇਨ ਲਈ ਮੈਚ ਦਾ ਇਕਲੌਤਾ ਗੋਲ ਐਲੇਕਸ ਬੇਨਾ ਨੇ ਕੀਤਾ। ਮਾਰਕੋਸ ਲੋਰੇਂਟੇ ਦੇ ਕਰਾਸ ਤੋਂ ਬਾਅਦ ਬੇਨਾ ਨੇ ਗੇਂਦ ਨੂੰ ਕੰਟਰੋਲ ਕੀਤਾ ਅਤੇ ਸ਼ਾਟ ਲਿਆ, ਜਿਸਨੂੰ ਉਰੂਗਵੇ ਦੇ ਤਜਰਬੇਕਾਰ ਗੋਲਕੀਪਰ ਫਰਨਾਂਡੋ ਮੁਸਲੇਰਾ ਰੋਕਣ ਵਿੱਚ ਅਸਫਲ ਰਹੇ ਅਤੇ ਗੇਂਦ ਉਨ੍ਹਾਂ ਦੇ ਹੱਥੋਂ ਨਿਕਲ ਕੇ ਜਾਲ ਵਿੱਚ ਚਲੀ ਗਈ।
ਸਪੇਨ ਕੋਲ ਮੈਚ ਦੇ ਸ਼ੁਰੂ ਵਿੱਚ ਲੀਡ ਲੈਣ ਦਾ ਮੌਕਾ ਸੀ, ਪਰ ਮਿਕੇਲ ਓਯਾਰਜ਼ਾਬਾਲ ਦੀ ਕੋਸ਼ਿਸ਼ ਨੂੰ ਉਰੂਗਵੇ ਦੇ ਡਿਫੈਂਸ ਨੇ ਨਾਕਾਮ ਕਰ ਦਿੱਤਾ। ਦੂਜੇ ਪਾਸੇ, ਉਰੂਗਵੇ ਵੀ ਹਮਲਾਵਰ ਦਿਖਾਈ ਦਿੱਤਾ, ਪਰ ਡਾਰਵਿਨ ਨੁਨੇਜ਼ ਅਤੇ ਰੋਡਰੀਗੋ ਬੈਂਟਾਨਕੁਰ ਆਪਣੇ ਮੌਕਿਆਂ ਦਾ ਫਾਇਦਾ ਉਠਾਉਣ ਵਿੱਚ ਅਸਫਲ ਰਹੇ।
ਹਾਫ ਟਾਈਮ ਤੋਂ ਬਾਅਦ ਉਰੂਗਵੇ ਨੇ ਮੁਸਲੇਰਾ ਦੀ ਜਗ੍ਹਾ ਸਰਜੀਓ ਰੋਸ਼ੇਤ ਨੂੰ ਮੈਦਾਨ ’ਤੇ ਉਤਾਰਿਆ ਗਿਆ। ਇਸ ਦੇ ਬਾਵਜੂਦ, ਉਰੂਗਵੇ ਬਰਾਬਰੀ ਦਾ ਗੋਲ ਨਹੀਂ ਕਰ ਸਕਿਆ। ਸਪੇਨ ਦੇ ਦਾਨੀ ਓਲਮੋ ਅਤੇ ਫੇਰਾਨ ਟੋਰੇਸ ਕੋਲ ਲੀਡ ਨੂੰ ਦੁੱਗਣਾ ਕਰਨ ਦੇ ਮੌਕੇ ਸਨ, ਪਰ ਇੱਕ ਕੋਸ਼ਿਸ਼ ਕਰਾਸਬਾਰ 'ਤੇ ਲੱਗੀ।
ਉਰੂਗਵੇ ਦੀਆਂ ਮੁਸ਼ਕਲਾਂ ਇੰਜਰੀ ਟਾਈਮ ਵਿੱਚ ਹੋਰ ਵੀ ਵੱਧ ਗਈਆਂ ਜਦੋਂ ਆਗਸਟਿਨ ਕੈਨੋਬੀਓ ਨੂੰ ਪੌ ਕੁਬਾਰਸੀ 'ਤੇ ਇੱਕ ਖਤਰਨਾਕ ਟੈਕਲ ਲਈ ਸਿੱਧਾ ਲਾਲ ਕਾਰਡ ਦਿਖਾਇਆ ਗਿਆ। ਇਸ ਤੋਂ ਬਾਅਦ ਸਪੇਨ ਨੇ ਮੈਚ ਆਸਾਨੀ ਨਾਲ ਖਤਮ ਕਰ ਦਿੱਤਾ।
ਇਸ ਜਿੱਤ ਦੇ ਨਾਲ, ਸਪੇਨ ਗਰੁੱਪ ਐਚ ਵਿੱਚ ਸਿਖਰ 'ਤੇ ਪਹੁੰਚ ਗਿਆ ਅਤੇ ਹੁਣ 2 ਜੁਲਾਈ ਨੂੰ ਆਖਰੀ 32 ਵਿੱਚ ਗਰੁੱਪ ਜੇ ਦੇ ਉਪ ਜੇਤੂ ਨਾਲ ਖੇਡੇਗਾ। ਆਸਟ੍ਰੀਆ ਇਸ ਸਮੇਂ ਗਰੁੱਪ ਜੇ ਵਿੱਚ ਦੂਜੇ ਸਥਾਨ 'ਤੇ ਹੈ।
ਦੂਜੇ ਪਾਸੇ, ਕੇਪ ਵਰਡੇ ਅਤੇ ਸਾਊਦੀ ਅਰਬ ਦੇ ਖਿਲਾਫ ਮੈਚ ਗੋਲ ਰਹਿਤ ਡਰਾਅ ਵਿੱਚ ਖਤਮ ਹੋਣ ਤੋਂ ਬਾਅਦ ਕੇਪ ਵਰਡੇ ਦੂਜੇ ਸਥਾਨ 'ਤੇ ਰਿਹਾ ਅਤੇ ਪਹਿਲੀ ਵਾਰ ਵਿਸ਼ਵ ਕੱਪ ਦੇ ਨਾਕਆਊਟ ਪੜਾਅ ਵਿੱਚ ਅੱਗੇ ਵਧਿਆ।
ਹਿੰਦੂਸਥਾਨ ਸਮਾਚਾਰ / ਸੁਰਿੰਦਰ ਸਿੰਘ
