ਕਾਠਮਾਂਡੂ, 29 ਮਾਰਚ (ਹਿ.ਸ.)। ਕਾਠਮਾਂਡੂ ਨਗਰ ਨਿਗਮ ਦੇ ਮੇਅਰ ਬਾਲੇਨ ਸ਼ਾਹ ਨੇ ਚੀਨ ਦੀ ਕਾਰਜਸ਼ੈਲੀ ਦੀ ਸਖ਼ਤ ਆਲੋਚਨਾ ਕੀਤੀ ਹੈ। ਉਨ੍ਹਾਂ ਨੇ ਨਾ ਸਿਰਫ ਨਗਰ ਪਾਲਿਕਾ ਦੀ ਤਰਫੋਂ ਰਸਮੀ ਪੱਤਰ ਲਿਖਿਆ, ਸਗੋਂ ਫੇਸਬੁੱਕ 'ਤੇ ਲੰਮਾ ਸਟੇਟਸ ਲਿਖ ਕੇ ਆਪਣੀ ਨਾਰਾਜ਼ਗੀ ਵੀ ਜ਼ਾਹਰ ਕੀਤੀ।
ਕਾਂਠਮੰਡੂ ਵਿੱਚ ਰਿੰਗ ਰੋਡ ਦੇ ਨਿਰਮਾਣ ਦਾ ਟੈਂਡਰ ਚੀਨੀ ਕੰਪਨੀ ਸੰਘਾਈ ਕੰਸਟਰਕਸ਼ਨ ਨੇ ਲਿਆ ਹੋਇਆ ਹੈ। ਕਰੀਬ 10 ਸਾਲ ਬੀਤ ਜਾਣ ਦੇ ਬਾਵਜੂਦ ਅਜੇ ਤੱਕ ਰਿੰਗ ਰੋਡ ਬਣਾਉਣ ਦਾ ਕੰਮ ਪੂਰਾ ਨਹੀਂ ਹੋਇਆ ਹੈ, ਜਿਸ ਕਾਰਨ ਆਮ ਲੋਕਾਂ ਨੂੰ ਆਉਣ-ਜਾਣ ਵਿੱਚ ਭਾਰੀ ਦਿੱਕਤ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਇਸ ਸਬੰਧੀ ਮੇਅਰ ਬਾਲੇਨ ਸ਼ਾਹ ਨੇ ਚੀਨ ਨੂੰ ਆੜੇ ਹੱਥੀਂ ਲਿਆ ਹੈ। ਨੇਪਾਲ ਸਰਕਾਰ ਅਤੇ ਕਾਠਮਾਂਡੂ ਨਗਰ ਨਿਗਮ ਵੱਲੋਂ ਵਾਰ-ਵਾਰ ਦਬਾਅ ਪਾਇਆ ਜਾ ਰਿਹਾ ਹੈ। ਸਮੇਂ ਸਿਰ ਕੰਮ ਪੂਰਾ ਕਰਨ ਦੀ ਬੇਨਤੀ ਕਰਨ ਦੇ ਬਾਵਜੂਦ ਚੀਨੀ ਦੂਤਘਰ ਵੱਲੋਂ ਕੰਮ ਨੂੰ ਗੰਭੀਰਤਾ ਨਾਲ ਨਹੀਂ ਲਿਆ ਜਾ ਰਿਹਾ ਹੈ।
ਬਾਲੇਨ ਸ਼ਾਹ ਨੇ ਆਪਣੇ ਫੇਸਬੁੱਕ ਪੇਜ 'ਤੇ ਇਕ ਸਟੇਟਸ ਲਿਖਦੇ ਹੋਏ ਕਿਹਾ ਕਿ ਚੀਨ ਜੋ ਆਪਣੇ ਦੇਸ਼ 'ਚ ਇਕ ਦਿਨ 'ਚ ਵੱਡੀਆਂ-ਵੱਡੀਆਂ ਇਮਾਰਤਾਂ ਬਣਾਉਣ ਦਾ ਦਾਅਵਾ ਕਰਦਾ ਹੈ, ਉਹ 10 ਸਾਲਾਂ 'ਚ 20 ਕਿਲੋਮੀਟਰ ਸੜਕ ਵੀ ਨਹੀਂ ਬਣਾ ਸਕਿਆ, ਇਸ ਤੋਂ ਵੱਡੀ ਵਿਡੰਬਨਾ ਕੀ ਹੋਵੇਗੀ। ਉਨ੍ਹਾਂ ਲਿਖਿਆ ਕਿ ਜਦੋਂ ਵੀ ਚੀਨੀ ਦੂਤਾਵਾਸ ਨੂੰ ਇਹ ਕੰਮ ਪੂਰਾ ਕਰਨ ਲਈ ਕਿਹਾ ਜਾਂਦਾ ਹੈ ਤਾਂ ਉਥੋਂ ਲੰਬਾ ਡਿਪਲੋਮੈਟਿਕ ਨੋਟ ਭੇਜ ਦਿੱਤਾ ਜਾਂਦਾ ਹੈ। ਬਾਲੇਨ ਨੇ ਕਿਹਾ ਕਿ ਨੋਟ ਭੇਜ ਕੇ ਅਤੇ ਸਾਡਾ ਵਿਰੋਧ ਕਰਕੇ ਚੀਨੀ ਦੂਤਘਰ ਅਤੇ ਉੱਥੇ ਦੀ ਕੰਪਨੀ ਆਪਣੀ ਜ਼ਿੰਮੇਵਾਰੀ ਤੋਂ ਬਚ ਨਹੀਂ ਸਕਦੀ। ਮੇਅਰ ਸ਼ਾਹ ਨੇ ਕਿਹਾ ਕਿ ਕਾਠਮਾਂਡੂ ਨਗਰ ਨਿਗਮ ਇੰਨੀ ਸਮਰੱਥ ਹੈ ਕਿ ਉਹ ਆਪਣੇ ਇੱਥੇ ਰਿੰਗ ਰੋਡ ਬਣਾ ਸਕਦੀ ਹੈ।
ਹਿੰਦੂਸਥਾਨ ਸਮਾਚਾਰ/ਸੁਰਿੰਦਰ/ਸੰਜੀਵ
